ᕿᒥᕈᔭᐃᓇᕆᓗᒍ

ᓄᓇᕗᑦᒥ ᐃᖃᓗᓕᕆᓂᕐᒧᑦ ᐱᓕᒻᒪᔅᓴᐃᓂᕐᒧᑦ ᐱᓕᕆᔩᑦ ᑮᓇᐅᔭᓕᐅᕋᓱᐊᖅᑎᐅᖏᑦᑐᑎᒃ ᑎᒥᐅᔪᑦ ᓴᖅᑭᖅᑕᐅᓚᐅᖅᓯᒪᔪᑦ 2005-ᒥ ᐱᓕᒻᒪᔅᓴᐃᖃᑦᑕᓂᐊᕐᒪᑕ ᓄᓇᕗᑦᒥ ᓄᓇᑖᖃᑕᐅᓯᒪᔪᓂᒃ ᐱᓕᕆᓇᓱᐊᕈᒪᔪᓂᒃ ᐃᖃᓗᓕᕆᓂᕐᒥ. NFTC-ᑯᑦ ᐱᑕᖃᑦᑎᑦᑎᕙᑦᑐᑦ ᐱᓕᒻᒪᔅᓴᐃᓂᕐᒧᑦ ᐱᕕᒃᓴᖃᕝᕕᐅᔪᓂᒃ ᐃᖅᑲᓇᐃᔮᓕᒫᑎᒍᑦ ᐊᒃᑐᐊᓂᖃᑦᑐᑦ ᐃᖃᓗᓕᕆᓂᕐᒧᑦ ᓲᕐᓗ ᐃᒫᒃ:

  • ᓴᓇᔭᐅᓯᒪᓂᐊᖅᑐᓂᒃ ᐋᖅᑭᒃᓱᐃᔩᑦ
  • ᐅᒥᐊᕐᔪᐊᕐᒥ ᐃᑲᔪᖅᑏᑦ
  • ᑮᓇᐅᔭᓕᕆᔨ
  • ᓴᓇᔭᐅᓯᒪᓂᐊᖅᑐᓂᒃ ᐋᖅᑭᒃᓱᐃᔨᒻᒪᕆᒃ
  • ᐃᖃᓗᓕᕆᕝᕕᒻᒥ ᐱᓕᕆᔨ
  • ᐃᖃᓗᓕᕆᕝᕕᒻᒥ ᐊᖓᔪᖅᑳᖅ
  • ᐃᒪᕐᒥᐅᑕᐃᑦ ᐊᐅᓚᐅᑎᓄᑦ ᓴᓇᔨ
  • ᐊᐅᓚᑦᑎᑎᐊᕐᓂᕐᒧᑦ ᐊᖓᔪᖅᑳᖅ
  • ᐃᖃᓗᓕᕆᓂᕐᒧᑦ ᐅᑦᔨᓱᖅᑎ
  • ᐃᑳᕈᑎᓕᕆᔨ
  • ᐊᖓᔪᖅᑳᖓ ᑐᖏᓕᖓ
  • ᑐᖏᓕᖓᑕ ᐃᑲᔪᖅᑎᖓ
  • ᑳᑉᑕᓐ
  • ᐊᖓᔪᖅᑳᒻᒪᕆᒃ
  • ᐅᒥᐊᓕᕆᔨ
  • ᓂᕿᓕᐅᖅᑎ

ᐃᓕᓐᓂᐊᕐᕈᒪᒍᕕᑦ ᓇᓕᐊᓐᓄᑐᐃᓐᓇᖅ ᑖᒃᑯᓄᖓ ᐃᖅᖃᓇᐃᔮᓄᑦ, NFTC-ᑯᑦ ᐊᑭᓖᓂᐊᖅᑐᑦ ᐃᓘᓇᖏᓐᓂᒃ ᑮᓇᐅᔭᖅᑐᕈᑎᖏᓐᓂᒃ ᑐᕌᖓᔪᓂᒃ ᐃᓕᓐᓂᐊᕐᓂᕐᒧᑦ – ᐊᐅᓚᕈᑎᑎ, ᑐᔪᕐᒥᔾᔪᑎᑦ, ᓂᕆᔾᔪᑎᓄᑦ, ᐃᓕᓐᓂᐊᕐᕋᔅᓴᐃᑦ ᐊᑭᓖᔾᔪᑎᖏᓐᓂᒃ, ᐊᒻᒪᓗ ᐃᓕᓐᓂᐊᖅᑏᑦ ᑮᓇᐅᔭᖅᑖᕆᕙᑦᑕᖏᓐᓂᒃ. If

ᐱᒋᐊᖅᕕᒃᓴᖏᑦ ᐅᓪᓗᐃᑦ ᐃᓕᓐᓂᐊᕐᕋᔅᓴᓄᑦ ᐊᑦᔨᒌᖏᑦᑐᑦ. ᐱᖃᑕᐅᔪᒪᒍᕕᑦ ᓇᓕᐊᓐᓄᑐᐃᓐᓇᖅ ᐃᓕᓐᓂᐊᕐᕋᔅᓴᓄᑦ ᐱᓕᒻᒪᔅᓴᕐᓂᕐᒧᑦ ᐊᑐᐃᓐᓇᐅᑎᑕᐅᔪᓄᑦ, ᒫᓐᓇᐅᔪᖅ ᑎᑎᕋᓚᐅᕐᕆᑦ ᑕᑕᑎᕆᐊᓕᓐᓂᒃ.

NFTC-ᑯᑦ ᐱᑕᖃᑦᑎᑦᑎᓇᓱᖃᑦᑕᕐᒪᑕ ᐅᓄᕐᓂᖅᓴᖏᓐᓂᒃ ᓄᓇᕗᑦᒥ ᐱᓕᒻᒪᔅᓴᕐᓂᕐᒧᑦ ᐃᓕᓐᓂᐊᕐᕋᔅᓴᓂᒃ – ᓄᓇᓕᓐᓂ ᐅᕝᕙᓘᓐᓃᑦ ᐃᖃᓗᓐᓂ. ᐱᑕᖃᖏᑉᐸᑕ ᐃᓪᓗᐃᑦ ᐃᖃᓗᓐᓂ, NFTC-ᑯᑦ ᐋᖅᑭᒃᓱᐃᓂᐊᖅᑐᑦ ᐃᓕᓐᓂᐊᖅᑎᓂᒃ ᐃᓕᓐᓂᐊᕐᕈᓐᓇᑎᑦᑎᓇᓱᐊᕐᓗᑎᒃ ᖃᓪᓗᓈᓂ ᑲᓇᑕᒥ.

ᐱᓕᕆᓂᖅ ᐃᖃᓗᒐᓱᐊᕐᓂᕐᒧᑦ ᓄᓗᐊᓂᒃ ᑭᒃᑯᓕᒫᓅᖓᖏᒻᒪᑦ, ᑭᓯᐊᓂᓕ ᐃᖅᑲᓇᐃᔮᑦᑎᐊᕚᓘᔪᓐᓇᖅᑐᖅ. ᐊᒥᓲᕗᑦ ᐃᖅᑲᓇᐃᔮᑦ ᐊᑐᐃᓐᓇᐅᔪᑦ ᐃᖃᓗᓕᕆᓂᕐᒥ ᓄᓇᓕᓐᓂ ᓇᒻᒥᓂᖁᑎᒋᔭᐅᔪᓄᑦ ᑲᑉᐸᓂᐅᔪᓂ. ᐃᖃᓗᒐᓱᒃᑏᑦ ᐊᖑᑏᑦ/ᐊᕐᓇᐃᑦ ᐱᓕᕆᓲᖑᕗᑦ 3-6 ᐱᓇᓱᐊᕈᓯᕐᓄᑦ ᐅᒥᐊᕐᔪᐊᕐᒥ, ᐊᖏᕐᕋᕆᓪᓗᑎᒃ ᐊᒻᒪᓗ ᐅᑎᒃᑲᓂᖅᑐᑎᒃ ᐃᖃᓗᒐᓱᒋᐊᖅᑐᑎᒃ ᑕᖅᑮᑦ ᐊᑕᐅᓯᐅᖏᑦᑐᖅ ᐊᓂᒍᒻᒪᑦ. ᐃᖃᓗᒐᓱᓐᓂᖅ ᐋᖅᑭᒃᓯᒪᑦᑎᐊᖅᑐᒥᒃ ᐃᓅᓯᖃᑦᑎᑦᑎᔪᓐᓇᖅᐳᖅ, ᐱᓕᕆᕐᔪᐊᑐᒻᒪᕆᐊᓘᑎᓪᓗᑎᑦ ᐅᒥᐊᕐᔪᐊᒦᑦᑐᑎᑦ, ᐊᑭᓕᖅᑕᐅᓂᐊᖅᑐᑎᑦ ᐱᓕᕆᓂᓐᓄᑦ ᐊᒻᒪᓗ ᐅᑎᓕᕐᒥᓗᑎᑦ ᓄᓇᒋᔭᓐᓄᑦ ᐊᐅᓚᖅᓯᒪᓚᐅᕐᓗᑎᑦ ᐅᒥᐊᒃᑯᑦ.

ᐱᓕᕿᓂᖅ ᖃᓂᒋᔭᖓᓂ ᓄᓇᐅᑉ ᐃᒪᕐᒥ ᐃᖃᓗᒐᓱᓐᓂᒃᑯᑦ ᐊᒃᓱᐊᓗᒃ ᖁᕕᐊᓇᕈᓐᓇᖅᑐᖅ. ᑕᒪᓐᓇᓗ ᑐᑭᖃᑉᐳᖅ ᐊᐅᓚᕆᐊᖃᕋᔭᓐᖏᓐᓇᕕᑦ ᐃᒫᓄᑦ ᐅᖓᓯᒃᑐᒧᑦ ᐱᓇᓱᐊᕈᓯᕐᓄᑦ 3-6-ᓄᑦ, ᑭᓯᐊᓂᓕ ᖃᓂᓐᓂᖅᓴᐅᓗᓂ ᓄᓇᒋᔭᓐᓄᑦ ᐃᖃᓗᒐᓱᐊᕐᓗᑎᑦ ᐊᒻᒪᓗ ᓂᐅᕐᕈᑎᔅᓴᓕᐊᕐᕆᓗᒋᑦ. ᐱᓕᕆᓂᖅ ᐃᖃᓗᒐᓱᓐᓂᒃᑯᑦ ᖁᕕᐊᓇᑦᑎᐊᕈᓐᓇᖅᑐᖅ ᐊᒻᒪᓗ ᑲᔪᓰᓐᓇᑐᒃᑯᑦ ᐃᖅᑲᓇᐃᔮᖑᔪᓐᓇᖅᑐᓂᒃ.

ᐱᓕᕆᓂᖅ ᐃᖃᓗᓕᕆᕕᒻᒥ ᐅᓪᓗᓗᒃᑖᖅ ᐃᖅᑲᓇᐃᔮᖑᔪᓐᓇᖅᑐᖅ ᑲᔪᓯᔪᒃᑯᑦ. ᐊᒥᓲᕗᑦ ᐱᑦᔪᑎᖏᑦ ᐃᖅᑲᓇᐃᔭᕐᓗᓂ ᐃᖃᓗᓕᕆᕕᒻᒥ ᐃᒪᓐᓇ ᑲᒪᒋᔭᖃᓪᓗᓂ ᐃᖃᓗᓐᓂᒃ, ᓂᐅᕐᕈᑎᔅᓴᓕᐊᕆᓗᒋᑦ, ᑲᒪᒋᔭᖃᕐᓂᖅ ᐱᓕᕆᐊᕐᓂᒃ, ᐊᒻᒪᓗᒃᑕᐅᖅ ᑲᒪᒋᔭᖃᕐᓂᖅ ᑮᓇᐅᔭᐃᑦ ᐊᐅᓚᑕᐅᓂᖏᓐᓂᒃ ᐃᖃᓗᓕᕆᕕᒃᑯᓐᓂᑦ. ᐱᖓᓲᕗᑦ ᐃᖃᓗᓕᕆᕖᑦ ᓄᓇᕗᒻᒥ – ᐃᖃᓗᒃᑑᑦᑎᐊᕐᒥ, ᑲᖏᖅᖠᓂᕐᒥ ᐊᒻᒪᓗ ᐸᖕᓂᖅᑑᒥ. ᑖᓐᓇᓕᖃᐃ ᓇᒻᒪᓈᑦᑎᐊᖅᑐᑦ ᐱᔪᒪᖃᑦᑕᖅᑕᐃᑦ.

ᑮᓇᐅᔭᖃᑦᑎᑕᐅᓂᖏᑦ ᐃᓕᓐᓂᐊᕐᕋᔅᓴᐃᑦ ᐅᓄᖅᑐᑲᓪᓚᓃᓐᖔᖅᑐᑦ:

ᐊᒻᒪᓗ ᐊᖑᓇᓱᒃᑐᓕᕆᔨᒃᑯᑦ ᑲᑎᒪᔨᖏᑦ ᓄᓇᕗᑦᒥ ᐊᒻᒪᓗ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᕐᓴᖅᕕᒃᑯᑦ ᑮᓇᐅᔭᐅᖏᑐᒃᑯᑦ ᐃᑲᔫᑎᖃᑉᐸᒻᒥᔪᑦ.

ᑲᑎᒪᔨᖏᑦ NFTC-ᑯᑦ ᑲᑎᒪᔨᖃᑉᐳᑦ ᑭᒡᒐᖅᑐᐃᔨᐅᔪᓂᒃ ᑖᒃᑯᓇᓐᖓᑦ ᑮᓈᐅᔭᖅᑖᖅᕕᐅᕙᑦᑐᓂᒃ ᐊᒻᒪᓗ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᕐᓴᖅᕕᑯᓐᓂᑦ ᐊᒻᒪᓗ ᑐᓐᖓᕕᒃᑯᓐᓂᑦ.